នៅថ្ងៃសុក្រ ១១ រោច ខែស្រាពណ៍ ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី៣០ ខែសីហា ឆ្នាំ២០២៤នេះ ឯកឧត្តម ម៉ែន អេង អភិបាលរងខេត្ត និងជាប្រធានលេខាធិការដ្ឋានគណៈកម្មាធិការគ្រប់គ្រងគ្រោះមហន្តរាយខេត្តស្វាយរៀងតំណាងឯកឧត្តម ប៉េង ពោធិ៍សា អភិបាលខេត្ត បានអញ្ជេីញជាធិបតីក្នុងកិច្ចប្រជុំ ធ្វើបច្ចុប្បន្នភាពផែនការត្រៀមបម្រុងសម្រាប់ឆ្លើយតបសង្គ្រោះបន្ទាន់គ្រោះមហន្តរាយទឹកជំនន់ន និងរាំងស្ងួតខេត្តស្វាយរៀង។
កិច្ចប្រជុំនេះ មានការអញ្ជើញចូលរួមពីលោក លោកស្រីប្រធានមន្ទីរអង្គភាពជុំវិញខេត្ត លោកអភិបាលក្រុង ស្រុក លោក លោកស្រីនាយកទីចាត់ការអង្គភាពចំណុះសាលាខេត្តលោកនាយករដ្ឋបាលក្រុង ស្រុក លោក លោកស្រីប្រធានអង្គភាពដៃគូនានា សរុបប្រមាណ ៧០នាក់។
ឯកឧត្តម ម៉ែន អេង អភិបាលរងខេត្ត និងក្នុងនាមជាប្រធានលេខាធិការដ្ឋានគណៈកម្មាធិការគ្រប់គ្រងគ្រោះមហន្តរាយខេត្តស្វាយរៀង បានថ្លែងអំណរគុណ និងកោតសរសើរចំពោះ កងកម្លាំងទាំងបីប្រភេទមន្ទីរអង្គភាពរដ្ឋបាលក្រុង ស្រុក និងអង្គការដៃគូនានាដែលតែងតែចូលរួមចំណែកយ៉ាងសកម្មអស់ពីកម្លាំងកាយចិត្តក្នុងការគ្រប់គ្រងគ្រោះមហន្តរាយជាពិសេសចូលរួមត្រៀមបង្ការឆ្លើយតបនឹងការសង្គ្រោះដល់ជនរងគ្រោះដោយសារគ្រោះមហន្តរាយនៅក្នុងភូមិសាស្រ្តខេត្តស្វាយរៀង។
ឯកឧត្តមបានបន្ថែមថាដោយសារតែអាកាសធាតុមានការប្រែប្រួលបណ្ដាលឱ្យគ្រោះមហន្តរាយកើតឡើងកាន់តែញឹកញាប់ហើយឥទ្ធិពលរបស់វាកាន់តែខ្លាំង នាំឱ្យប៉ះពាល់ដល់អាយុជីវិតក៏ដូចជា ជីវភាពរស់នៅនិងការអភិវឌ្ឍផងដែរ ទន្ទឹមនេះក៏សូមអំពាវនាវដល់មន្ទីរអង្គភាពជុំវិញខេត្ត ក្រុង ស្រុក ឃុំ សង្កាត់បង្កើនការយកចិត្តទុកដាក់ជាប្រចាំពាក់ព័ន្ធការងារគ្រប់គ្រងគ្រោះមហន្តរាយមិនអាចធ្វេសប្រហេសបានឡើយ។
