ឯកឧត្តមអភិបាលខេត្តស្វាយរៀងបានអនុញ្ញាតឲ្យប្រតិភូក្រុមហ៊ុនសាយលន់គ្រុប នៅក្នុងតំបន់សេដ្ឋកិច្ចពិសេសឈីលូជានពុចាយ ចូលជួបសម្តែងការគួសម និងពិភាក្សាការងារ
នាព្រឹកថ្ងៃអាទិត្យ៣រោច ខែពិសាខ ឆ្នាំថោះ បញ្ចស័ក ព.ស២៦៧ ត្រូវនឹងថ្ងៃទី០៧ ខែឧសភា ឆ្នាំ២០២៣នេះ ឯកឧត្ដម ម៉ែន វិបុល អភិបាលខេត្តស្វាយរៀង បានអនុញ្ញាតឲ្យលោក YUAN ZHONGXUE យន់ ជុងសៀ នាយកមជ្ឈមណ្ឌល់ស្រាវជ្រាវបច្ចេកវិទ្យាកៅស៊ូ និងសំបកកង់ជាតិ នៃប្រទេសចិន និងប្រតិភូចូលជួបសម្តែងការគួសម និងពិភាក្សាការងារក្រោយក្រុមហ៊ុនសាយលន់គ្រុបបានសាងសង់ និងដាក់ឱ្យដំណើរការរោងចក្រផលិតសំបកកង់។
ជំនួបនេះក៏មានការអញ្ជេីញចូលរួម ពីឯកឧត្តម អភិបាលរងខេត្ត លោកអភិបាលរងក្រុងស្វាយរៀង និងមន្ត្រីពាក់ព័ន្ធមួយចំនួនទៀតផងដែរ។
លោកនាយកមជ្ឈមណ្ឌល់ស្រាវជ្រាវបច្ចេកវិទ្យាកៅស៊ូ និងសំបកកង់ជាតិ នៃប្រទេសចិន បានថ្លែងអំណរគុណចំពោះឯកឧត្តមអភិបាលខេត្តដែលកន្លងមកឯកឧត្តមតែងតែផ្តល់នូវការគៀគរគ្រប់មធ្យោបាយដើម្បីអោយក្រុមហ៊ុនសាយលន់ ក៏ដូចជាក្រុមហ៊ុននានាមកបណ្តាក់ទុនវិនិយោគនៅខេត្តស្វាយរៀង បើកដំណើរការដោយជោគជ័យនាពេលកន្លងទៅនេះ ទន្ទឹមនោះក្រុមហ៊ុនបាននឹងកំពុងបន្តពង្រីកវិសាលភាពក្រុមហ៊ុនឲ្យកាន់តែរីកចម្រេីនបន្ថែមទៀត ដេីម្បីវិស័យឧស្សាហកម្មនាំចេញទៅក្រៅប្រទេស ក៏ដូចជាផ្តល់ការងារធ្វេីជូនបងប្អូនប្រជាពលរដ្ឋដែលមកបំពេញការងារក្នុងរោងចក្រនេះ។
ឯកឧត្ដមអភិបាលខេត្តបានសម្ដែងនូវការស្វាគមន៍ និងគាំទ្រយ៉ាងពេញទំហឹងចំពោះ លោកអគ្គនាយកក្រុមហ៊ុនសាយលន់គ្រប់ រួមទាំងក្រុមហ៊ុនដៃគូផ្សេងៗទៀត ដែលបានមកបណ្ដាក់ទុនវិនិយោគជាបន្តបន្ទាប់នៅក្នុងទំបន់សេដកិច្ចពិសេសឈីលូ ក្រុងស្វាយរៀង ក៏ដូចជាតំបន់នានាទៀត ក្នុងខេត្តស្វាយរៀងយេីង។
ឯកឧត្ដមបន្តថា ក្នុងនាមរដ្ឋបាលខេត្ត សូមគាំទ្រទាំងស្រុងចំពោះដៃគូវិនិយោគនានាមកបណ្តាក់ទុននៅខេត្តស្វាយរៀង ដោយការសូមស្វាគមន៍យ៉ាងកក់ក្តៅដែលនាំមកនូវផលប្រយោជន៍ដោយបង្កើតបានការងារធ្វើជូនប្រជាពលរដ្ឋក្នុងខេត្ត ហើយក៏ជាកិច្ចការសំខាន់ដែលឯកឧត្ដមអភិបាលខេត្តតែងតែយកចិត្តទុកដាក់ទាំងការរក្សាសន្តិសុខ សុវត្ថិភាពជូនដល់ក្រុមហ៊ុនទាំងអស់នោះផងដែរ។
